En 1992 Abel Ferrara atopábase na so particular cume artística: un llugar privilexáu onde básicamente sufríase como nel infiernu. Con un machete esmelláu ente unos dientes esgonciaos, el direutor de Teniente corrupto lluchaba por igual escontra los sos degorrios y les sos adicciones, mentanto nun dexaba de crear les imáxenes más violentes que’l cine de los 90 podría echase a la cara. Si n’El rey de Nueva York (1990) vino pa dicir que Scorsese y Coppola yeren unos blandinos, en Teniente corrupto la so esploración del abismu diba superar cualquier llende moral establecida. Pero nada d’esto sedría posible ensin la complicidá d’un Harvey Keitel totémicu, míticu, sagráu, al que vemos en porretes mentanto l’abismu nun dexa d’afuñicalu.
